à Zincourt, l’7 éd janvier 2019
Min clognon,
Qué vérlèe pour écmincher l’énèe, mes gins ! Attindez qu’éj vos diche. Mais dvant d’vos raconter mn’afoaire, éj vos pérsinte à tértous mes boins vux pour 2019. « Boéne énèe boéne santè, pi des pécaillons tout du long d’chés douze moés… » ch’est éne formule picarde qu’a s’dit coér. In pèrlant d’formule, j’ai mingè à none à Puchvilé. Ch’est din un tchot cafè épicerie à doù qu’o peut s’foaire sarvir à minger pèr des jonnes gins fin amiteux pi qu’is pèrl’té picard. À preuve, échl inseigne éd leuz étamintet ch’est : « Au Tio Puch », éq ch’est un ju d’mot aveuc éch nom d’poéyi et pi un puche, qu’a sinifie un indroét qu’oz y puche dé l’ieu. J’n’ai point bu qu’d’él ieu pi jé nn’ai prins éne boéne panchie. J’étoais fin d’attaque pour aller triner mes coeuches din chés rues d’Nor. J’n’avoais point coér vu chés plaques éd rues éq din ch’poéyi lo is sont rdoublèes in picard. N’trachez point eute pèrt din ch’départémint : l’rue d’éch Catieu, l’rue d’chés Clairons, rue d’él Croé… pour l’heure i n’y o qu’à Nor qu’o peut vir des noms in picard conme o. Ta qu’éj sus din chés plaques in picard, ém vlo rindu à Zincourt. J’ai vnu éspré ichi pour acater des lédjeumes à chol nouvelle boutique qu’al rimplache éch cabaret « Chez Marius ». Achteure, is vind’t des produits locals, des fruits, du mié, éd l’heule, du cite pi d’él biére, et pi des lédjeumes conme o nin voét dsu leuz inseigne au cotè d’leu nouvieu nom : « Ch’panier d’Marius ». Coér éne anonche in picard ! A m’foait plaisi, j’ainmeroais nin vir conme o tout partout pèr ichi. Prindons nné dol grainne, dol grainne éd picard a n’édmande qu’à pousser din no départémint.
Adè,
Tchot Mile ch’Reudailleu
Zincourt | Gézaincourt
vérlèe | promenade
boéne énèe | bonne année
none | midi
Puchvilé | Puchevillers
puche | puits
pucher | puiser
nin prinde éne boéne panchie | faire bonne chère
coeuche| chaussure
Nor | Naours
tracher | rechercher
heule | huile
cite | cidre
